O titular da Xunta, Alberto Núñez
Feijóo, e a presidenta da Sociedade Estatal de Participacións Industriais
(SEPI), Pilar Platero, avaliaron hoxe os plans de Navantia para Galicia, así
como o Plan estratéxico que a SEPI está a ultimar para a compañía.
Durante unha xuntanza mantida hoxe
en San Caetano, Feijóo e Pilar Platero abordaron, en primeiro lugar, o
importante impacto que os orzamentos estatais, aínda pendentes de tramitación
parlamentaria, terán sobre Navantia e, en concreto, sobre a ría de Ferrol. Non
en van, a construción das cinco fragatas F-110 suporán un volume de contrato
que alcanzará un importe aproximado de 4000 millóns de euros e xerará dez anos
de traballo para a factoría de Ferrol, onde manterá ao redor de 7000 empregos
anuais directos e indirectos.
Ademais do programa das fragatas,
que xa ten reservados 250 millóns de euros consignados como anticipo financeiro
nos Presupostos do Ministerio de Economía, Industria e Competitividade, os
estaleiros da ría reforzarán os seus niveis de ocupación coa finalización do
sexto buque de acción marítima (BAM). A isto súmase o programa en curso dos
buques loxísticos para Australia, a enxeñaría do buque de asalto anfibio para a
Mariña turca e a colaboración no programa de fragatas para a Mariña
australiana, ademais da actividade na área de enerxía eólica e de reparación de
gaseiros.
O presidente da Xunta tamén avaliou
con Pilar Platero as últimas novidades sobre o Plan estratéxico de Navantia
que, nestes momentos, segundo explicou a presidenta da SEPI, se está a negociar
cos sindicatos e que prevé unha carteira de pedidos de 11.000 millóns ata 2022.
Nesta liña, ambos os dous analizaron
os avances na internacionalización da empresa, a modernización dos centros coa
incorporación de novas tecnoloxías ou o desenvolvemento da dixitalización e a
aplicación dos principios do Estaleiro 4.0.
Durante a xuntanza, o responsable do
Goberno galego reiterou o pleno compromiso da Xunta co sector, reflectido, por
exemplo, no eido da formación, co desenvolvemento dun plan de formación
específico para o naval ao que se destinan 12 millóns de euros para cualificar
3000 traballadores.
Fuente: Xunta de Galicia