Esta nova Unidade
está emprazada no terceiro andar do Hospital Naval de Ferrol, implicada cos
Servizos de Saúde Mental, Pediatría e Rehabilitación
O conselleiro de Sanidade, Jesús
Vázquez Almuiña; e o de Política Social, José Manuel Rey Varela, coñeceron esta
mañá a nova Unidade de Saúde Mental Infanto-xuvenil da Xerencia Integrada de
Ferrol. Esta unidade potencia a atención á Saúde Mental dos máis novos creando
un dispositivo específico, que comezaba a funcionar a principios deste mes, no
terceiro andar do Hospital Naval do Complexo Hospitalario Universitario de
Ferrol. Trátase dunha Unidade dirixida á atención ambulatoria de pacientes
menores de 16 anos que presenten un trastorno mental, especialmente aquelas
patoloxías caracterizadas pola complexidade da sintomatoloxía.
A Xerencia Integrada de Ferrol
traballou na coordinación funcional desta nova Unidade de Saúde Mental
Infanto-Xuvenil co Servizo de Psiquiatría, do que pasa a formar parte; e
integrarase fisicamente coa área de Atención Pediátrica Ambulatoria, que
englobará a Área de Consultas Externas de Pediatría, a Unidade de Atención
Temperá -actualmente emprazada no Hospital Novoa Santos- e a Unidade de Saúde
Mental infanto-Xuvenil, garantido así unha abordaxe multidisciplinar de cara á
normalización dos problemas dos nenos. O equipo de atención estará formado por
un especialista en Psiquiatría, un en Psicoloxía Clínica, un profesional de
Enfermaría de Saúde Mental, un traballador social, e un profesional
administrativo.
Con esta incorporación da nova
Unidade á carteira de Servizos do Sergas -tal e como ocorre con estas unidades
no resto da Comunidade Autónoma- realízase unha reestruturación da actividade
de xeito que se poida prestar dunha forma compartida entre a área sanitaria
ferrolá e a entidade que ata o momento traballou positivamente nese ámbito ata
a actualidade a través de convenios de colaboración.
Organización da atención
Así, constitúese un equipo de
profesionais cuxo obxectivo fundamental é o de ofrecer unha atención
ambulatoria de calidade aos pacientes que lle sexan remitidos fundamentalmente
dende o nivel de atención primaria e, no seu caso, tamén dende outros niveis
asistenciais. Atenderá, ademais, as consultas urxentes e ingresos hospitalarios
na Xerencia de Xestión Integrada de Ferrol, e proporcionará apoio e asesoramento
aos servizos de atención primaria e a outros profesionais sanitarios.
Así, o acceso realízase
principalmente dende os Servizos de Atención Primaria e consultas de Pediatría,
aínda que tamén acceden pacientes tanto dende outros servizos especializados como,
de xeito protocolizado, dende outros dispositivos asistenciais alleos, como
Aspaneps, cos que se mantén unha estreita colaboración para atender aqueles
problemas non psiquiátricos e máis enmarcados no entorno social e familiar do
paciente. Estímase a abordaxe de en torno a 380 primeiras consultas anuais a
esta poboación menor de 16 anos.
Funcións da nova Unidade
As funcións da nova Unidade de Saúde
Mental Infanto-Xuvenil do Complexo Hospitalario Universitario de Ferrol son as
mesmas que para as Unidades de Saúde Mental (USM), e centradas na poboación
entre os 0 aos 16 anos. A primeira delas é a función clínica e asistencial a
nivel especializado xa mencionada, sendo a referencia dos Servizos de Atención
Primaria de onde procederá fundamentalmente a demanda asistencial, atendendo
aos pacientes remitidos; realizando actividades de interconsulta e de enlace
intrahospitalario; e, tamén, asesoramento e derivación, de ser necesario.
Ademais, a Unidade de Saúde Mental
Infantil participará en actividades de promoción da saúde e prevención da
enfermidade mental, priorizando o apoio e asesoramento aos distintos
dispositivos da rede de atención ao menor, tanto sanitarios como non
sanitarios. A terceira das funcións da Unidade de Saúde Mental Infanto-Xuvenil
é a de coordinación e xestión, para traballar cos demais recursos e
dispositivos asistenciais de índole sanitaria e non sanitaria existentes, e, de
xeito específico, cos de saúde mental da Xerencia. A Unidade encargárase de
organizar o desenvolvemento das actividades que ten encomendadas, de tal xeito
que se obteña o mellor aproveitamento dos seus recursos; e intervirá no seu
control, incluíndo a elaboración de indicadores, memorias anuais, e outros
documentos, onde se recollan as misións encomendadas e as actividades
realizadas.
Por último, a función Investigadora,
Formativa e Docente, isto é, a formación continuada dos diversos profesionais
que forman parte do equipo, que deberá permitir unha mellor actuación dos
mesmos, e unha oferta de servizos máis ampla e variada. Para iso, organizaranse
sesións clínicas e bibliográficas específicas do propio equipo, que participará
nas sesións xerais que teña programadas o Servizo de Psiquiatría do Complexo, á
vez que considerará e poderá promover actividades con outros Servizos e
Unidades
Fuente: Xunta de Galicia