Os Socialistas de Fene piden que se retire o novo aglomerado da Fraga e se
asfalte outra vez toda a rúa
Critican tamén a actitude do Alcalde, que en lugar de “esixir que se amañe
esta chapuza, confórmase cun remendo pactado coa Deputación, un rebacheo en dúas
zonas puntuais.”
Fene, 1 de marzo de 2014
Hai tan só uns tres
meses que a Deputación Provincial da Coruña aglomerou de novo toda a
céntrica rúa da Fraga, o vial que, pasando polas inmediacións da Casa do
Concello, conecta a avenida Marqués de Figueroa (Perlío) coa avenida Naturais
de Fene. Sen embargo, hai semanas que o
novo pavimento se está despegando, enchendo de fochancas a rúa, que fan que
hoxe estea xa máis intransitable do que estaba antes co vello asfalto.
Por iso, o PSdeG-PSOE
de Fene esixe que se actúe de xeito inmediato para solucionar o que Iván
Puentes, portavoz municipal, califica como “despilfarro e unhas das maiores
chapuzas que se teñen visto nunha rúa do Concello”. A solución para os
socialistas non é outra que retirar o
novo asfalto e volver a aglomerar toda a rúa, xa que cada día que pasa
aparece unha nova zona na que se levanta o pavimento. “É evidente que algo non
se fixo ben. Non pode ser que un asfaltado que debería aguantar ata 10 anos en
perfectas condicións se levante aos 15 días de ser botado”, sentencia Puentes.
O portavoz socialista afirma tamén que “é comprensible
que na execución das obras poda haber erros, pero o intolerable é que a
Administración nestes casos, en lugar de esixir a corrección deses erros, mire
para outro lado e despilfarre os cartos de todos”. Refírese con isto Iván
Puentes á solución anunciada polo Acalde de Fene no último pleno, no que ante
as preguntas do Grupo Municipal do PSdeG-PSOE sobre esta obra, Gumersindo Galego afirmou que non se ía
volver a asfaltar a rúa, senón que simplemente se repoñería o pavimento
despegado en dúas zonas, no cruce do Xulgado de Paz e nas inmediacións da
oficina de Correos.
As pegas que os socialistas lle poñen a esta solución son
dúas. Por unha banda, consideran inadmisible que un asfaltado que foi
contratado como completo sexa entregado xa con remendos e con cortes no
pavimento, posto que nin as condicións de circulación nin as de mantemento son
as mesmas, deteriórase antes. E por outra banda, o problema non afecta só a
esas dúas zonas, que foron as primeiras en levantarse, senón que é un problema
que afecta a toda a estrada. A mellor proba disto é que nos últimos días
apareceron xa novas fochancas no cruce coa avenida Marqués de Figueroa e en
diversos puntos intermedios da vía.
O problema sempre é o mesmo, despégase o novo asfalto e
deixa á vista o vello. É dicir, parece evidente que o que hai é un problema de
adherencia entre o novo aglomerado e o antigo, que quedou por debaixo, algo que
acontece habitualmente cando o asfalto se bota a unha temperatura inferior á
indacada. Por iso, os socialistas insisten en que a única solución real é
retirar completamente este novo aglomerado e botalo de novo e anuncian novas
iniciativas neste sentido tanto no pleno do Concello de Fene, como no da
Deputación Provincial da Coruña.
