O alcalde de Fene agradeceu á Cía de Blanca Marsillach o traballo que está a realizar a prol da integración das persoas con discapacidade
“Moitas grazas. É o máis fermoso que me pasou na
vida”, asegurou esta mañá unha das espectadoras que asistiron á representación
da obra “Enamórate de Lope” na Sociedade Agarimo de Sillobre. A Compañía de
Teatro de Blanca Marsillach foi acollida con entusiasmo en Fene e nas dúas
funcións (ás que asistiron ao redor de duascentas persoas de diversas
asociacións da provincia) vivíronse, en palabras da actriz Carolina África,
“momentos cheos de maxia, amor e diversión”.
“No concello de Fene pechamos unha etapa coa
esperanza de abrir a posibilidade de que xente con capacidades diversas poida
ter a súa oportunidade no mundo do teatro”, asegurou a productora e artista
Blanca Marsillach ao remate dunha das representacións. En rolda de prensa, Marsillach amosouse feliz
polos resultados acadados con este proxecto que se encadra no Programa de Teatro Interactivo para Persoas
con Discapacidade e que agora entra nunha nova fase na que, segundo avanzou a
actriz, apostarán por integrar na propia compañía a persoas con capacidades
diversas.
Pola súa parte, o alcalde
de Fene augurou unha enorme repercusión social e mediática para o espectáculo
da Compañía de Blanca Marsillach, á que agradeceu especialmente o seu paso por
Fene. Gumersindo Galego loubou ademais o traballo que están a realizar as
asociacións que traballan con persoas discapacitadas porque “as dinámicas de
grupo que adoitan empregar no seu quefacer diario axudan aos rapaces e rapazas
a enfrontarse ao público”.
“Enamórate de
Lope”, obra baseada en poemas do grande dramaturgo do Século de Ouro Lope de
Vega, conta unha historia de amor en tono de traxicomedia romántica. Durante a
primeira parte do espectáculo, os espectadores son testemuña de cómo evoluciona
a historia de amor “conforme o ton dos poemas se fai cada vez máis romántico e
profundo”, para pasar a continuación a unha serie de talleres interactivos nos
que se realizan lecturas dramatizadas dos textos coa participación dos
espectadores. Así, nesta segunda parte da representación, os asistentes ao
teatro teñen oportunidade de subir ao escenario e recitar poemas,
familiarizándose primeiro con eles (coa axuda dos actores) e persoalizándoos
ata, finalmente, facelos seus.
Galería de fotos del acto:
 |
| Blanca Marsillach y el alcalde de Fene Gumersindo Galego |
