O XURADO ACORDOU DEIXAR DESERTO O PRIMEIRO PREMIO 

 

De esquerda a dereita: Almudena Marcos, coordenadora do Museo do Humor de Fene, e o Xurado do "Premio Curuxa 2015", formado por: Andrés Meixide, humorista gráfico; Juventino Trigo, alcalde de Fene; Amalia García, concelleira de Cultura e Ensino; Siro López, humorista gráfico; David Pintor, humorista gráfico; Daniel Romero, xestor de actividades culturais do Concello de Fene (secretario do Xurado)

O xurado do XVIII Concurso de Humor gráfico “Curuxa do Humor”, reunido esta mañá no Museo do Humor de Fene, acordou outorgar o segundo premio do certame á obra “Que rolo de guerra”, do autor Manuel Arriaga de León, e deixar deserto o primeiro premio ao considerar que “ningún dos traballos presentados a concurso acadaba o nivel de calidade de debuxo e humor esixido a unha convocatoria con esta traxectoria, prestixio e dotación económica”. 

Á hora de outorgar o 2º premio do XVIII certame “Curuxa do Humor”, o xurado valorou a temática escollida polo autor, Manuel Arriaga de León, “a condena da guerra en clave de humor, cun razoamento incuestionable: o absurdo da guerra e o feito de seren sempre (as guerras) contrarias aos intereses populares”. A nivel técnico, segundo o xurado, trátase dunha ilustración que segue a tradición do ´cartoon” americano.

O xurado do XVIII premio “Curuxa do Humor” estivo formado polo alcalde de Fene, Juventino Trigo, a concelleira de Cultura e Ensino, Amalia García, o xestor de actividades culturais do Concello, Daniel Romero, e os humoristas gráficos Siro López, David Pintor e Andrés Meixide.

Segundo informa a Concellería de Cultura e Ensino, o premio para o autor da obra premiada consistirá  nunha gratificación ecónomica de  1.500 euros e diploma. O acto de entrega do mesmo terá lugar o venres 6 de novembro ás 20 horas nas instalacións do Museo do Humor de Fene e en presenza do alcalde de Fene, Juventino Trigo Rey, e da Concelleira de Cultura e Ensino, Amalia García Balado. Nesa mesma xornada, amais da entrega galardón ao autor premiado este ano, comezará no museo fenés o ciclo “Novembro Mes do Humor”.

O Premio Curuxa do Humor  é un certame  que o Museo do Humor de Fene organizou de xeito ininterrompido e cunha periodicidade anual dende a súa fundación, en 1984, ata o ano 2007 e que o Concello de Fene recuperou no ano 2014 con motivo da conmemoración do seu 30º aniversario. O certame naceu co obxectivo de premiar aos mellores humoristas gráficos do país e, coa súa recuperación, a Concellería de Cultura e Ensino pretende outorgar ao Museo do Humor unha maior proxección pública, tanto en Galicia coma no resto de España.

Vinte orixinais se presentaron a esta convocatoria dos premios Curuxa. A procedencia dos mesmos foi moi variada, remitíndose dende cidades e vilas tan dispares como Fene, Ferrol, A Coruña, Santiago de Compostela, Vigo,  Zaragoza, Sevilla, Picassent (Valencia), Alicante, Arrigorriaga (Vizcaya), Barcelona ou Azuqueca de Henares (Guadalajara).