O Círculo Mercantil Industrial Unidade de Fene terá lugar hoxe sábado día 13, ás 20.00 horas a presentación do libro gañador do XXXV Certame Nacional de poesía "Xosémaria Pérez Parallé", título da obra: "Fraxilidades", Autor: Gisela Mato, editado por Espiral Maior. A obra foi escollida polo xurado entre as 74 obras presentadas. Os actos péchanse coa actuación do dúo de Fran Amil (voz solista e guitarra acústica) e Fernando Román (saxo tenor), co espectáculo "Popsía". A actuación está organizada pola Concellería de Cultura de Fene coa colaboración da Deputación da Coruña (Rede Cultural), con entrada libre e de balde até completar o aforo.
"Popsía" é un proxecto multidisciplinar que pretende achegar clásicos da lírica galega de tódolos tempos á mocidade do século XXI, para difundir o legado inmorredoiro da cultura galega dende o medievo ata os nosos días, vehiculado a través de estilos musicais como o pop; o rock; o swing; o regatón; o soul; o funk; etc.
A traxectoria de Fran Amil amosa a vontade de fornecer á mocidade de Galicia dun acervo cultural en galego, con visos de contemporaneidade e universalidade que poña en valor aspectos fundamentais como o respecto, a solidariedade e o esforzo ou a non violencia, sen descoidar o aspecto lúdico da música, cunha forte compoñente didáctica. Unha traxectoria á que hai que sumar os discos gravados con diversos grupos de música folk, rock, jazz ou pop da historia recente en Galicia (Os Papaqueixos, Tres Trebóns, Ulträqäns, Chuches Amil, etc).