O Salón de Plenos da Casa do Concello acolle dende este venres,
2 de xuño, a exposición “As Bestas da Redención. Os doce traballos de
Hércules”. Trátase da primeira exposición de Teo Castro e Sara Alonso, dous
artistas feneses que empregan o debuxo como ferramenta de creación artística e
vehículo de expresión. A mostra inaugúrase este mesmo venres ás 18 horas e
poderá visitarse no Concello de Fene até o vindeiro 30 de xuño, en horario de
9.00 a 14.00 horas.
“As bestas da
redención. Os doce traballos de Hércules” configúrase ao redor de “doce
ilustracións que representan cada un dos, tamén, doce traballos hercúleos”. A
exposición trasládanos a un mundo onírico, creado por estes dous artistas
feneses, que centran a súa mirada e atención no bestiario Herculino. O
resultado son unhas imaxes cheas de forza e enerxía que nos levan por ese
mundos mitolóxicos.
O proxecto, dirixido pola responsable do Taller de Creación
Artística “Laudas Calamity” de Fene, Laura Bouza, comezou en novembro do pasado
ano “coa idea de crear un álbum ilustrado/ libro obxecto”.
Segundo Laura
Bouza, “a delicadeza e preciosismo de Teo Castro contraponse á mancha e fereza
de Sara que nos fai soñar perdéndonos no interior deses fondos indeterminados e
infinitos”. As ilustracións foron realizadas en técnica mixta e nelas o debuxo
é o verdadeiro protagonista, o que reafirma a idea do debuxo procesual.
En definitiva,
“As Bestas da Redención. Os doce traballos de Hércules” pretende poñer en valor
o proceso de creación artística onde cada unha das ilustracións é o resultado
dunha procura de contido e estética”.
