Con maxia de perto, xogos de cartas,
cordas e panos, o mago Pedro Bugarín engailou este mediodía aos pequenos/as (e
aos/ás non tan pequenos/as) que asistiron á primeira función do ciclo de maxia
e contos que organiza a Concellería de Cultura de Fene no Nadal. O espectáculo,
titulado "Mundo máxico",
reuniu no salón de actos da Casa da Cultura a máis de medio de cento de
persoas.
A maxia dará paso aos contos na
xornada do mércores 27 de decembro. Así, mañá ás 12 horas, o salón de actos da
Casa da Cultura acollerá o espectáculo “Voute contar”, a cargo de Vicente
Mohedano (Peripecious). En “Voute contar” é posible “que algún día descubras
que, dun tempo para aquí, os humanos adquirimos a manía de contar. Contar,
contar...non só de contar contos e historias, senón de medir e contar todo con
números”. Actividade recomendada para público a partir dos 8 anos.
A programación cultural de Nadal do
Concello de Fene continuará o xoves 28 de decembro, ás 12.00 horas, cunha
actuación de Andaravía Teatro na Casa da Cultura. Nesta actividade, titulada
“Brincacontos”, sucederanse acontecementos máxicos e misteriosos. “O
descubrimento da receta do mexunxe marrón de Testarrota causará unha grande
disputa entre dúas poderosas bruxas. Quen acadará a enerxía que transmite este
misterioso mexunxe?. Por outro lado, algo lle está a acontecer á lúa e ao sol.
Serán quen de resolvelo a miñoca inxenua, o vello grilo e a formiga obreira?.
Para respostar a estas preguntas, os membros de Andaravía Teatro convidan aos
nenos/as de 3 a 12 anos a brincar con eles o vindeiro 28 de decembro na Casa da
Cultura de Fene.
Neste mesmo espazo, o venres 29 de
decembro actuará o grupo Paso de Valverde Teatro con “Alén. Chuquiño viaxa polo
mundo”, ás 12.00 horas. “Alén do mar e
alén de todo o que coñecía, un día Chuquiño marcha á procura do seu tío
Randulfo a África, pero a viaxe vai resultar un pouco máis complicada do que
pensaba e remata coñecendo o mundo enteiro nunha travesía colorida a través do
Xapón, India, América... Conseguirá atopar o noso protagonista ao seu tío, o
explorador?”. “Alén. Chuquiño viaxa polo mundo” é unha historia de teatro de
sombras chinesas para toda a familia. Actividade recomendada para público de 3
a 12 anos.
