Corenta e cinco debuxos conforman a mostra de humor
gráfico “Premios Curuxa 2017” que se poderá ver durante os meses de outubro e
novembro na sala de exposicións temporais do Museo do Humor de Fene. A
exposición permanecerá aberta ao público dende o luns 9 de outubro até o xoves
30 de novembro no seguinte horario: de luns a venres, de 10.00 a 13.00 horas e de
16.00 a 21.00 horas, e os sábados, de 10.00 a 13.00 horas.
A exposición “Premios Curuxa 2017” incluirá unha selección dos traballos presentados este ano ao concurso de
humor gráfico que convoca anualmente o Museo do Humor de Fene. Salientan as obras dos artistas galardoados nesta
edición: Borja Ramón López Cotelo, “El primo Ramón” (1º premio na categoría
Curuxa), Andrés Meixide Gayoso (2º
premio na categoría Curuxa), Andrés
Simal González (1º premio na categoría Curuxa Nova) e Andrés Garrido Martín (2º
premio na categoría Curuxa Nova).
A maiores da exposición dos orixinais
presentados a concurso, a partir do vindeiro luns, tamén se habilitará na web
do museo http://museodohumor.fene.gal (no apartado de "Exposicións") unha
galería de imaxes cunha selección de obras.
Dende a
Concellería de Cultura de Fene agradécese a participación dos/as artistas que
enviaron debuxos aos Premios Curuxa 2017 e convídase ao/ás mesmos/as e a todos
os veciños/as de Fene e comarca a visitar a exposición. Tamén se adianta que a
entrega de premios aos gañadores desta convocatoria será o venres 3 de novembro
de 2017, ás 20.00 horas, coincidindo co comezo do ciclo "Novembro Mes do
Humor" no Museo do Humor de Fene.
